監製證李思捷形象趕客難請嘉賓

因為扮嘢能力強而在娛圈殺出血路的李思捷愈撈愈掂，加上《玩嘢王》一役令他自信爆燈。去年呢位「自信王」又成功獻計冧掂綜藝科總監余詠珊，讓他開節目做主持仲撈埋監製一職，一個人話晒事巴閉到震。

[img]http://www02.ktzhk.com/attachment.php?aid=726273&noupdate=yes&nothumb=yes[/img]

但事前懶神秘的新節目《今晚睇李》在二月初出街後被網民千插萬笑，罪名是九成九翻Dup外國節目，零創意被噓爆為「抄嘢王」，加上遊戲無聊、訪問無Heart，終極四不像節目換來超難請嘉賓惡果。《頭條日報》接觸到余詠珊愛將、臨危接爛攤的衞世輝監製：「佢（思捷）係趕客嘅，以前成日整蠱人。」問到跟思捷相處情況，監製坦言：「佢係好有要求，要時間磨合。」抄嘢都有要求？好敬業喎。

有傳電影《衝上雲霄》一眾演員嫌《今晚睇李》無聊，遊戲感覺cheap爆以及主持態度麻麻所以拒上節目。有知情「二五」又向《頭條》透露：「夾過兩次期，一次演員去咗馬來西亞宣傳，一次香港有活動，第三次個期都差唔多上映，演員無一個同思捷熟，又覺得佢形象唔好，講嘢又口不擇言，唔需要咁趕去賣人情畀佢。」

對於傳聞，衞監製強調只是演員度唔到期：「其實節目都請過好多大星做嘉賓，吳君如同楊千嬅都肯上嚟。」問到嘉賓是他還是思捷邀請，監製停了兩秒語帶雙關「無話邊個請，成Team人一齊做啦，有啲嘢一個人做唔晒嘅。」語畢還透露未來將有超勁嘉賓登場，名字當然要保密。

再問難請嘉賓問題，監製坦言起初有難度：「李思捷個名趕客，因為佢最叻整蠱人，個個嘉賓怕上佢節目要被整蠱，之後節目出街，啲人知係Talk Show先放心。」

至於跟出名麻煩的思捷合作，有余詠珊全力支持的監製答得輕鬆：「佢好有要求，有啲想法同公司規條唔一樣，例如佢想節目中嘅Band搵出面嘅人擔任，我咪同佢理性分析，用溫和方法同佢傾，『喂，呢啲嘢觀眾根本睇唔出。』」最終李思捷都肯妥協。

節目在周日晚合家歡時段播出，但長期只Keep住17點一般收視，曾對余詠珊豪言：「《玩嘢王》咁收得，有我點會唔掂！」的李思捷洩晒氣，日前下午同菲傭現身跑馬地，他先去超市買飲品，再去入咪錶，然後入了養和醫院。

個多小時後，戴了口罩的他離開醫院往買外賣，眼神散渙的他同記者透露往探母親：「住幾日，無乜事。」全程Chok味減半，霸氣盡失，成個人落晒形。

阿媽唔舒服加上「親生」節目被人插手，「雙悲」的思捷過馬路頭耷耷唔睇車，有輛車只距他兩三個身位，險象環生。