2014-3-7 13:08
sinta
朗尼加薪絕對值
上季玩完馬後炮，今季就做預言家，同大家一齊睇吓嚟緊周末有咩好睇。今周傾咩：朗尼值超高人工？
當曼聯以30萬鎊周薪同朗尼（左）續約時，唔少曼聯球迷都覺得反感，一來情感上戥曼聯唔抵，畀朗尼呢個兩度以轉會要脅加薪嘅反骨仔話晒事；二來朗尼嘅實力配唔上呢個人工。不過，球壇通脹係大趨勢，朗尼呢個人工又唔係話高得好誇張；若果朗尼加完人工後肯專心踢波的話，絕對值呢個數。
大概十幾年前，曼聯以當時的巨額5萬鎊周薪同堅尼續約，當時唔少人話曼聯咁做會破壞薪酬結構，球員點值咁貴人工。但喺今日，連一個贊奴沙都6萬鎊周薪時，真係不得不感嘆球員人工通脹得好勁。通脹並唔係曼聯或朗尼嘅問題，係球壇嘅趨勢，原因有二，首先中東同俄羅斯富豪注資歐洲球壇，佢哋大灑金錢，球員人工水漲船高。以咁嘅勢頭，相信一兩年後，會再有球員打破朗尼呢個周薪紀錄。
另外，足球呢盤生意越來越賺錢，好似曼聯咁，年年收入創新高。球會收入多咗，球員自然會要求高啲人工。正如各位打工仔，見到公司賺錢，你唔會考慮自己對公司嘅貢獻有冇多到，而係純粹覺得公司賺多咗，就自然要加人工！如果你係朗尼，見到球會啱啱出爐份財政部告又話賺大錢，唔通唔要求加薪咩！
朗尼係曼聯嘅代表人物，亦係英格蘭第一球星，雖然佢嘅盤扭及速度好似越嚟越差，但朗尼絕對唔係一位不思進取嘅球員，剩係睇佢今季嘅罰球，就知佢應該落咗唔少心機去練。若果朗尼之後專注踢波，同桑馬達交流多啲，取長補短，絕對值30萬鎊一星期。
[img]http://static.apple.nextmedia.com/images/apple-photos/apple/20140307/large/aa0403a.jpg[/img]
來源:蘋果日報網站