墮後核心先係寶

討論今個星期寫咩題目嗰陣，小弟聽到牽牛兄話阿迪達拖慢阿仙奴進攻，兵工廠唔應該用呢個戰術，但我就覺得，阿迪達呢類防中先係寶，係球隊前進嘅動力。
阿迪達呢個位嘅英文名係deep-lying midfielder，中文可以譯做墮後組織核心，呢個位置喺派路成名後成為熱潮，沙比阿朗素同晚期嘅史高斯都係代表人物。墮後組織核心係球隊進攻嘅司令，對於鍾意圍住對手嚟搓嘅阿仙奴嚟講，就更加重要。當奧斯爾、辛迪卡索拉等喺前場搵唔到機會，塞死晒嗰陣，睇透全局嘅阿迪達就會出現喺佢哋身後，等佢哋可以回傳，畀呢位西班牙中場重新轉邊發辦。
阿迪達今季場均傳球61.9次，排隊內第3，僅次艾朗藍斯同奧斯爾，成功率高達92.4%。最重要嘅係，佢係除門將以外，阿仙奴場均長傳最多嘅球員，場均4.2次。喺阿仙奴嘅4-2-3-1陣式入面，中前場攻守分工清晰，阿迪達負責做墮後核心，用精準嘅長傳分配最適合嘅進攻方向。佢嘅拍檔可以係法米尼或者艾朗藍斯，對強隊就用前者，加強防守，對弱隊可用後者，加入其後上入禁區能力。
前面嘅3位進攻中場就有好大自由度，靠互相短傳入滲，而中鋒基奧特就係橋頭堡，主要吸引對方防線注意力。自韋拉同基拔圖施華走後，呢套戰術就係阿仙奴嘅主流，行咗好多年，今年行得最順，仲踢出成績，就唔好畀佢停嘞！


[img]http://static.apple.nextmedia.com/images/apple-photos/apple/20140207/large/aa03_05_a.jpg[/img]
■阿迪達做墮後組織，是阿仙奴的中場發電機。


來源:蘋果日報網站