車仔桑馬達都是贏家

就快新年，電視例牌會不斷重播賭神類電影。莫耶斯率先「跟風」，在轉會市場以3,700萬鎊賭鑊甘。車路士、曼聯和桑馬達三方，看來車仔和桑馬達已封蝕本門。有人可能質疑摩佬為何會將高質球員送到敵對球會？其實上輪聯賽3:1擊敗對手後，摩佬已覺曼聯「失去」敵對球會資格，送你一個用不着的球員，還可收回近4,000萬鎊，何樂而不為？
對桑馬達而言，明明身懷絕技，竟在車仔屈居後備，長此下去，隨時連西班牙世界盃大軍都冇份，當然希望轉會搏翻身。選擇曼聯，或許有點風險，但肯定博得過！因為就算未能令紅魔回升，同留在車仔一樣都冇運行；但萬一他發揮出奧斯爾加盟兵工廠的「買一送三」的威力，拯救紅魔於險境，就是聲價十倍、大吐烏氣的好機會，分分鐘世界盃穩坐埋正選。

[b]紅魔防線致命弱點[/b]
不過，對買家曼聯而言又如何？沒錯，桑馬達的創造力和級數，絕對是曼聯現在非常缺乏的，尤其在尹佩斯與朗尼輪流傷的日子。但紅魔至今最嚴重的，不只唔識入波，後防穿窿才最致命！尼曼查維迪、里奧費迪南及艾拉巔峯已過，防中亦欠缺可靠人選，現花了這筆轉會費於桑馬達身上，相信更難在這幾天轉會窗關閉前，找到具級數的中後場球員。
當然，要改善後防需要時間磨合；改善進攻可能博中一位球星便有效。已被迫埋牆角的莫耶斯，將所有注碼全押在桑馬達身上，也是唯一選擇。

[img]http://static.apple.nextmedia.com/images/apple-photos/apple/20140127/large/aa03_07_a.jpg[/img]
■莫耶斯仍要為曼聯的增兵事宜煩惱。資料圖片


來源:蘋果日報網站