歧視國援？！鞠盈智慶祝被重罰

足總前日宣佈紀律委員會第9次會議嘅裁決結果，當中太陽飛馬中場鞠盈智，被指喺對皇室南區嘅銀牌準決賽，入波後向對方球迷作出挑釁行為而判罰停賽4場。飛馬教練陳志康噚日講明唔服判決，決定今日入信足總，為失望到想離港嘅阿智上訴！

[b]教練呼冤：佢全場被問候[/b]
飛馬喺銀牌決賽以1:2不敵南華，球員已經失望至極，鞠盈智更禍不單行，被指喺對南區場銀牌4強，入波後將手指放嘴前，同埋將手放耳邊嘅慶祝動作係「向公眾作出挑釁行為」，判罰停賽4場。阿智被重罰後喺facebook呼冤︰「我覺得真係唔公平，以前有球員、有教練喺比賽中罵粗口，畀中指，做出侮辱性嘅言語跟動作，都冇罰得比我嚴重，我只係唔明白，係挑釁嚴重定係侮辱性嘅問題嚴重呢？」佢仲話傷心到有離開香港嘅想法㖭。
除咗阿智不忿外，教練陳志康（Cowboy）都為愛將抱不平︰「全場被球迷問候，佢已經好克制，而佢嘅慶祝動作都唔係向住對方球迷。何況放隻手喺耳邊，可以係叫球迷大聲啲歡呼，視乎判決嘅人點睇。」至於阿智停賽4場，肯定會缺席兩場對傑志嘅聯賽，有陰謀論指傑志喺背後做嘢，傑志總領隊伍健在fb撰文指：「其實紀律小組是一個根據預先公佈的紀律章程做出獨立裁決的組織，而董事局亦不負責編排一早定好了的賽程。這些陰謀論其實都是網友天馬行空想像出來的。」Cowboy亦重申唔關其他球隊事，唔應該要對方食死貓。反而最令佢不滿嘅係，足總做唔到一視同仁：「若然球證認為阿智嘅動作有問題，咁好多球員都要受同樣處罰。所以我哋聽（今）日會入紙上訴。」事實上，當日南區李毅凱被逐後都有向飛馬球迷粗言相向；而港足前鋒陳肇麒喺省港盃首回合，都有向對佢柴台嘅球迷做出將手指放嘴前嘅動作，兩者最後都冇受罰。

[b]陳譚新指判罰偏重[/b]
至於前國際球證陳譚新都認為判罰過重，「佢唔係舉中指，而假設今次呢個行為真係有挑釁性，我覺得判罰係偏重，之前阿仙奴禾確特都冇罰啦。我唔認識鞠盈智，唔知佢過往嘅紀律係點，如果紀錄麻麻，一早被認定係『搞事分子』，就可能罰咁重。」有超過20年執法經驗嘅陳sir補充：「入波慶祝動作，每個人都唔同，但好明顯嘅挑釁行為，例如納粹姿勢，就一定唔可以容忍。」

[img]http://static.apple.nextmedia.com/images/apple-photos/apple/20140116/large/img0000012_aa04.gif[/img]


來源:蘋果日報網站