爆鼻又斷腳　阿奴浴血做一哥

59秒可以做啲乜？咪夠阿仙奴入兩球囉。阿仙奴禮拜一喺英超作客阿士東維拉，靠韋舒亞喺59秒內入一球同助攻畀基奧特，最後贏2:1，報番首循環主場輸1:3之仇，仲攞番個榜首位。然而，佢哋就有路斯基同蒙利爾傷出，前者爆鼻，後者斷腳，隨時有排唞。


[b]59秒入兩球奠勝[/b]
由於車仔同曼城喺呢輪聯賽都全取3分，所以阿仙奴嘅壓力都幾大。不過，挾4連勝強勢訪維拉嘅阿仙奴冇令粉絲失望，喺34分鐘由韋舒亞接應蒙利爾嘅助攻射入而先開紀錄，韋舒亞喺58秒後靚交畀基奧特入波，半場領先2:0；雖然賓迪基喺76分鐘幫主隊追番一粒，但兵工廠最後都喺維拉公園球場贏2:1。
領隊雲格賽後表示：「所有人都睇住我哋。人哋喺周末攞晒3分，梗係想我哋失分，所以我哋唔可以有半點差池。我哋絕唔容許失分，想唔失分就要贏波，結果我哋亦成功用行動嚟回應。」阿仙奴家陣21戰得48分，比同場數嘅曼城及車仔，分別多1分同兩分。

[b]路斯基蒙利爾或長唞[/b]
阿仙奴雖然將連勝走勢增至5場，但就增添兩個傷兵，中場路斯基喺爭頂時俾主隊前鋒艾邦拉荷個手踭打爆鼻骨，左閘蒙利爾就可能俾維拉後衞華亞爾鏟斷跖骨。雲格咁話：「我未肯定路斯基係咪鼻骨斷咗，但佢嘅情況好嚴重。我睇唔到事發經過，但之後會睇番錄影帶。路斯基同我講，佢都唔肯定對方係咪有心。至於蒙利爾單嘢應該係意外，對手冇心傷佢；稍後佢會進行詳細檢查，睇吓跖骨有冇斷到。」
另外，維拉後衞尼敦巴卡喺21分鐘食咗阿仙奴小將基拿比嘅波餅後，疑因輕微腦震盪而唔可以繼續比賽，要由巴根拿入替；維拉領隊林拔事後表示，好彩尼敦巴卡冇乜大礙。

[img]http://static.apple.nextmedia.com/images/apple-photos/apple/20140115/large/img0000023_aa05.gif[/img]


來源:蘋果日報網站