神醫話4個月搞掂　禾仔有救？

禾仔有救嘞！效力阿仙奴嘅英格蘭國腳翼鋒禾確特，因為膝頭前十字韌帶撕裂而要養傷6個月，提早收咧之餘兼打唔到今夏世盃決賽周，但係有個神醫聲稱有計，令禾仔唞4個月就可以返球場比賽，趕得切去巴西參賽。

我求大俠以為呢個神醫，係醫好過奇連士文、朗拿度同保特等體壇巨星嘅德國名醫禾花夫，但原來唔係。佢係蘇格蘭醫生哥頓麥基，之前有喺蘇格蘭老牌球會格拉斯哥流浪幫過手。麥基教授就話：「阿仙奴經已諗好點樣幫禾確特進行康復治療。如果佢哋唔介意嘅話，我樂意畀意見，等佢哋有多個選擇。」禾確特會喺未來兩星期進行手術，修補佢傷咗嘅韌帶，之後要唞6個月先可以返球場比賽。麥基教授就提議，將個特殊支架放入禾確特嘅膝頭哥，咁樣可以固定關節，令到條韌帶可以快啲癒合。

[img]http://static.apple.nextmedia.com/images/apple-photos/apple/20140109/large/09s4-009p.jpg[/img]
■麥基教授（右）曾經醫好英國冰壺選手哥頓麥杜加爾，仲上埋報紙㗎。互聯網

[b]醫掂英雪橇選手[/b]
麥基教授仲話，如果照佢嘅方法去醫，禾確特最快喺12個星期後就會好番晒，然後可以進行跑步等練習，5月就可以返球場比賽，絕對趕得切喺夏天去巴西踢世盃決賽周。
講就天下無敵，麥基教授係咪齋吹嘅先？梗係唔係啦，英國冬運雪橇選手約翰積遜喺舊年7月腳踭重創要唞6個月，麥基教授就用獨有方法醫佢，結果佢喺3個月後就傷癒復出，認真神奇。如果我求大俠係禾確特，肯定會博一博囉！
至於阿仙奴方面，由於禾仔提早收咧，賓特拿又要養傷一個月，加上基奧特近排成日因傷病踢唔到，所以有消息話兵工廠老細高安基肯開水喉，畀領隊雲格喺冬天轉會市場簽新球員。

[b]老細開水喉班兵[/b]
阿仙奴嘅目標好多，包括皇家馬德里前鋒艾華路莫拉達、波圖前鋒積臣馬天尼斯、史浩克中場達斯拿、巴塞隆拿翼鋒柏度洛迪古斯，同埋之前喺英超踢過車路士嘅里爾前鋒沙洛文卡勞。
聽聞雲格計劃買積臣馬天尼斯，但贖身費高達3,320萬鎊，以雲格嘅性格，應該唔會咁易俾人撳住搶。


來源:蘋果日報網站