400球獻畀黑豹　C朗贏盡掌聲？

「黑豹」尤西比奧周日病逝，作為新一代葡萄牙足球icon嘅基斯坦奴朗拿度（C朗）總算收拾心情，喺周一西甲聯賽個人梅開二度，協助皇家馬德里主場3:0輕取切爾達。累積球員生涯第400個入球嘅C朗，入球後雙手指天，以入球為黑豹送行。
皇馬雖然同尤西比奧冇咩淵源，不過陣中都有好多葡萄牙球員，好似C朗、比比、法比奧干查奧等，周一對切爾達賽前，都搞個簡單而隆重嘅哀悼儀式，巴拿比奴球場大電視播出尤西比奧以往比賽雄姿，全場默哀。

[b]「將入球獻畀佢」[/b]
C朗一直都好尊敬呢位葡萄牙一代前鋒，帶住傷感正選比賽；皇馬先由賓施馬門前建功打破僵局，82分鐘C朗接應丹尼爾卡華積傳中近門射入，領先至2:0；入球後C朗雙手指天，將入球獻畀黑豹；補時階段，巴利助攻畀C朗，射成3:0，呢個入球對C朗又有另一番意義，因為係佢球員生涯累積第400個入球。
梅開二度嘅C朗賽後感觸咁話：「星期日我成日都好唔開心，因為尤西比奧帶畀我哋葡萄牙足球係好大意義，我將入球獻畀佢。佢係一位好可愛老人家，一直支持我，對國家隊亦十分關心；我感謝大家對佢嘅悼念，葡萄牙感受到西班牙，以及全世界嘅慰問。」另外，尤西比奧母會賓菲加，周一就係光明球場舉行悼念黑豹活動，過萬球迷向呢位葡萄牙巨星送別。

[img]http://static.apple.nextmedia.com/images/apple-photos/apple/20140108/large/08s5-902p.jpg[/img]
■皇馬球員賽前為「黑豹」默哀。路透社

[img]http://static.apple.nextmedia.com/images/apple-photos/apple/20140108/small/08s5-903pzok.jpg[/img]
尤西比奧


[b]迪馬利亞做不文手勢[/b]
講番皇馬場波，C朗雙手指天贏得掌聲，迪馬利亞嘅不文手勢就惹禍上身；呢位阿根廷快翼今仗表現低迷，下半場被調離場，由巴利入替；換人期間，主隊球迷向佢勁噓，佢就用手抓下體，有挑釁舉動，賽後教練安察洛堤鬧佢嘅行動不理智。
其實迪馬利亞嘅地位已經俾巴利搶緊，今次仲激嬲皇馬球迷，睇嚟都難留銀河艦隊。


來源:蘋果日報網站