2013-12-9 12:45
sinta
謝四傷出 阿蘇：世盃要砌低英軍
孫子兵法有云：「千里饋糧，士有飢色；食敵一鐘，當吾二十鐘」，大意係帶兵最高境界，就係食敵之糧；利物浦嘅烏拉圭前鋒蘇亞雷斯就深明此度，效力英超球隊賺取豐厚英鎊人工，下年世界盃分組賽就同英格蘭爭出線，「咬人蘇」仲信心十足話烏拉圭可以K.O.英軍㖭。
蘇亞雷斯呢排入球停不了，上周中對諾域治食大四喜後，上周六主場對韋斯咸又有1球進賬，協助紅軍4:1大勝，壓過失分嘅車路士同曼城回升第2位，仲以14個入球高踞英超神射手榜首。阿蘇嘅入球率真係好驚人，季初因咬人事件停賽，今季踢咗10場聯賽已經入咗14球，保持呢個走勢，全季總入球3字頭以上一啲都唔難。
26歲嘅蘇亞雷斯處於當打期，季初已經傳出畀皇家馬德里、阿仙奴等吼實，紅軍堅持唔放人。阿蘇呢期越踢越勁，球會都要用銀彈戰術留人；據報利物浦不惜打破球會薪酬上限，願為阿蘇提供20萬鎊周薪（約250萬港元），希望將阿蘇留喺晏菲路。
[b]謝四拉傷或有手尾[/b]
但賺緊英鎊，唔代表阿蘇會畀面英格蘭，世界盃分組上周五完成抽籤，烏拉圭、意大利同英格蘭就編入死亡D組，烏拉圭第1場對同組較弱嘅哥斯達黎加，第2場就對英軍。阿蘇充滿自信咁講：「我知道唔容易，不過烏拉圭可以擊敗英格蘭；抽籤前我同一班英格蘭國腳隊友講笑，話如果抽中對英格蘭就好嘞，點知真係成真。烏拉圭、意大利同英格蘭實力都好平均，不過天氣環境對我哋有利。」
阿蘇仲話好期待同隊長謝拉特交手，不過呢位中場就有啲麻煩，對韋斯咸一戰拉傷腿筋下半場退下火線，周一接受詳細檢查先知嚴重程度。紅軍12月會鬥熱刺、車路士等強隊，冇神奇隊長真係好頭痕。
[b]巴神好勁又𡁻兩粒[/b]
除咗阿蘇，英格蘭同組對手、意大利嘅國腳都好勇；上周六意甲，AC米蘭作客2:2賽和利禾奴，AC前鋒「巴神」巴洛迪利梅開二度，包括83分鐘炮彈式罰球幫AC追平。以佢對英超同英格蘭嘅深仇大恨，D組首戰意大利對英格蘭好睇嘞。
[img]http://static.apple.nextmedia.com/images/apple-photos/apple/20131209/large/img0000012_aa03.gif[/img]
來源:蘋果日報網站