巴利戴帽威過C朗　網民激讚

皇家馬德里今季以1億歐元收購加里夫巴利，起初俾唔少人笑佢哋買錯水貨，好彩巴利生性越踢越好，喺上周六西甲做出加盟皇馬後嘅首次連中三元，助球隊喺主場4:0大勝華拉度列。想當年基斯坦奴朗拿度（C朗）都要加盟近一季先至首演帽子戲法，巴利賽後都識做，落足鞋油吹捧C朗，你知俾人眼紅就唔係幾好喇。

[img]http://static.apple.nextmedia.com/images/apple-photos/apple/20131202/small/aa03_01_a.jpg[/img]
■C朗（左）掛住同女友艾琳娜密密斟，興趣似乎大過睇波。

[b]獲連尼加twitter祝賀[/b]
C朗繼續因傷缺陣，預計最快下場聯賽先復出，佢喺今場波就同女友艾琳娜舒舒服服坐喺包廂睇波。不過皇馬冇C朗唔緊要，呢場西甲主場迎戰華拉度列，教練安察洛堤派出巴利、賓施馬同迪馬利亞組成「三叉戟」一樣掂。巴利喺33分鐘頭槌執雞揭開屠殺序幕，3分鐘後巴利右路斜傳畀賓施馬拉開比數；下半場馬些路兩次左路傳中造就巴利再入兩球，助皇馬喺西甲5連勝。
巴利呢場波只係佢第13次代表皇馬上陣，就獻出佢第一次帽子戲法；想當年C朗喺09/10球季加盟皇馬，要去到季尾第36輪西甲先至首次連中三元，幫皇馬作客4:1擊敗馬略卡。而巴利亦係繼1987年嘅連尼加之後，歷來第2位喺西甲單場入3球嘅英倫三島球員，連呢位前英格蘭國家隊前鋒都喺twitter度祝賀佢。

[img]http://static.apple.nextmedia.com/images/apple-photos/apple/20131202/large/02s3-003pnew.jpg[/img]
■趁C朗缺陣，加里夫巴利（左）搶盡風頭，首次喺皇馬連中三元。路透社

[b]賽後識做狂讚C朗[/b]
今季踢13場波貢獻9入球6助攻，巴利賽後佢獲贈今場比賽用嘅皮球，亦不忘同C朗講吓好說話：「全部隊友都有喺個波上面簽名，大家都有祝賀我，真係好開心。冇咗C朗對我哋嚟講無疑係好大打擊，因為佢係世界最佳球員，不過既然佢養緊傷，我哋就要努力做埋佢嗰份。C朗除咗係好球員，仲係我嘅好榜樣，作為隊友，我喺佢身上一直學到好多嘢，希望可以令我繼續進步。」


來源:蘋果日報網站