大炒4、5、7球　西甲三雄唔妥689？

上個星期六嘅西甲炒、炒、炒！陪球迷炒足全晚！巴塞隆拿先喺頭場以4:0大勝CF格蘭納達，之後皇家馬德里作客狂數艾美利亞5:0，仲未夠喉？尾場馬德體育會再炒個大大鑊，派咗7隻光蛋畀基達菲！西甲3大強隊鬥派蛋，我求大俠都睇到飽晒。


[b]美斯賽前show金靴獎[/b]
上周六晚11點，巴塞先送上小炒王做頭盤！雖然冇咗美斯，但尼馬擔正，加埋法比加斯後上，主場輕輕鬆鬆贏格蘭納達4球。呢場恩尼斯達、法比、阿歷斯山齊士同柏度洛迪古斯各建一功，每人炒一吓，已經將格蘭納達一鑊熟！雖然美斯受傷唔出得，但巴塞都搵佢拎埋個歐洲金靴獎出嚟見球迷，當係伴碟都唔錯。
開完個胃就到3點食皇馬嗰餐！皇馬作客艾美利亞，煮法係先慢火，再猛火炒。基斯坦奴朗拿度（C朗）3分鐘就入波，但之後大半場都冇波入。喺下半場初段，C朗仲因傷退下火線。美斯傷完到列貝利，𠵱家連C朗都傷，唔通爭金球獎都有魔咒？放心，C朗賽後話傷勢唔嚴重：「為保險起見先要求離場，冇咩特別。只係被踢咗一吓，肌肉有少少痛。」雖然C朗受傷，但冇影響皇馬呢場要落鑊大炒艾美利亞！喺比賽最後半個鐘，賓施馬、加里夫巴利、艾斯高同艾華路莫拉達各入一球，幫皇馬大勝5:0。教練安察洛堤賽後都話C朗冇大礙，佢仲讚艾斯高同伊拿拉文迪踢得好，可以頂替長唞嘅基迪拉。

[b]馬體會派7蛋最威[/b]
如果各位球迷仲未夠喉，唔使落老麥買早餐住，因為馬體會唔執輸，喺凌晨5點開波嘅比賽，送7隻蛋畀大家睇。馬體會呢碟主場炒基達菲夠晒鑊氣，韋拿同魯爾加西亞梅開二度，迪亞高哥斯達同阿祖安盧比斯每人一球，加埋盧普嘅烏龍波，以7:0大勝基達菲，各項賽事主場9連勝！我求大俠有位朋友對數字好敏感，佢睇完呢3場波後話，點解西甲3雄係炒4、5同7球，而咁啱唔係炒6、8、9球，唔通連足球之神都唔妥689？

[img]http://static.apple.nextmedia.com/images/apple-photos/apple/20131125/small/25s7-407p.jpg[/img]
■美斯唔踢得都拎個歐洲金靴獎出嚟見球迷。美聯社

來源:蘋果日報網站