叻哥愛將怒撐　魔鬼胸：不如執咗亞視

前晚係無綫嘅台慶，亦都係網民發起要熄電視嘅日子，加上阿叻嘅挑機宣言，令到台慶成為一個熱門話題。而一班有份參與台慶嘅藝人，過咗呢晚，就紛紛喺微博到發言喇，好似張繼聰咁，佢先話自己因為台慶，苦練咗兩個星期，佢話：「為一個一分鐘的演出，這兩個星期我花了無數時間去苦練！身處其中，亦親眼目睹很多同事也拼盡去練習準備！」

而過咗一陣﹐張繼聰又講咗另一段，就話：「絕對明白觀眾有選擇的自由，作為表演者，就算付出了多少，大部份時間也不會得到觀眾的掌聲，甚至基本尊重，這方面體會甚深，但我仍然熱愛和尊重每次演出！而我肯定的說，和我抱著相同信念，每天在tvb努力著的表演者有很多很多！衷心祝福每位同行，無論身處那機構，也想給大家打個氣，加個油！共勉。」

講緊應該就係，佢明白大家點解要熄機，但都想大家知道表演者都係有努力，同大家打下氣咁話。而張繼聰呢段微博，黃浩然同江美儀都有轉發到，佢哋兩個都同張繼聰講句加油。

而另一個藝人蔚雨芯，即係魔鬼胸嗰個呢，佢係阿叻旗下藝人，自然要撐老闆啦。佢喺微博一開頭就話喺台慶好開心，但之後佢就提及發牌事件，仲話不如叫亞視執咗佢：「今晚很熱鬧，開心，高興！其實……我會將事情分開來看！我當然希望政府發牌，希望演藝圈百花齊放，有競爭才有進步。但本人認為，不是無綫電視令到政府不發牌，無綫電視一向陪伴著我們成長，一直以來提供娛樂給香港所有觀眾。倒不如叫沒有收視的亞視『執』咗佢啦！熄機=成功發牌？」蔚雨芯咁講法，係唔係算係支持港視呢？而過咗一陣，蔚雨芯就上演一幕「又要威又要帶頭盔」，嗰頭撐老闆，過咗一陣就刪咗個微博留言。

[img]http://static.apple.nextmedia.com/images/apple-photos/video/20131121/org/1384978497_93e1.jpg[/img]


來源:蘋果日報網站