2013-11-18 13:28
sinta
舒賀爾尼寸朗尼唔夠班
正所謂虎落平陽被犬欺，26歲門將赫特喺曼城失去正選位置，上周五英格蘭國家隊友賽智利，赫特連英軍No.1門神都畀費沙科士打搶埋，周二英軍再喺溫布萊友賽德國，赫特獲領隊鶴臣批准打番正選，為自己前途，點都唔可以再失威嘞！
英格蘭上周五友賽主場淨吞智利雙蛋，畢竟球隊都仲可以用世界盃試陣為目標，鶴臣都冇俾人喪插，周二面對德國，兩軍之前都有宿怨，而且級數更高，英格蘭就要更認真對付；好似克服輕傷嘅謝拉特，連同史杜列治、安祖斯唐辛、艾殊利高爾等復任正選，曼聯後衞菲爾鍾斯就因傷退隊。
[img]http://static.apple.nextmedia.com/images/apple-photos/apple/20131118/large/18s4-338p.jpg[/img]
■朗尼（右）上場表現一般，難怪被舒賀爾尼寸。路透社
[b]缺陣半月有鶴臣撐佢[/b]
英、德友賽另一個焦點就係門將赫特打番正選，話時話，赫特自從10月27日英超代表曼城作客車路士孭鑊後，已經大半個月冇比賽，一下子就要面對3屆世界盃冠軍，鶴臣幫赫特打定底先，佢賽前就講：「如果對智利時用赫特，失兩球之後佢又會飽受批評，呢個足球圈就係咁，我只希望赫特可以適應，亦都只可靠自己。」些路迪門將費沙科士打都好識做，賽前講明赫特係英軍陣容其中一個頂級球員，仲要跟佢學嘢咁話。點都好，赫特真係好自為之，如果對德軍再派膠，真係神仙都幫你唔到，下年隨時冇份去巴西。
[b]舒賀爾尼先辣㷫朗尼[/b]
雖然呢場係太公波，但車路士嘅德國翼鋒舒賀爾尼就先撩事鬥非，賽前寸朗尼係就係好球員，不過德國好球員大把，每個位置都有2、3個，如果朗尼生於德國，都未必有得入選國家隊㖭！但德國教練路維就先張揚會示人以弱，決定讓隊長拿姆、門將紐亞同中場奧斯爾輪休，獲准提早返球會報到；咁最開心自然係阿仙奴，之前魔鬼賽程踢到五癆七傷，奧斯爾提早歸隊外，中堅哥斯尼附加賽首回合拎紅牌，都大條道理可以休息。
另外，效力皇家馬德里嘅德國中場基迪拉，上仗對意大利時左膝十字韌帶撕裂，雖然做咗手術，但仲要休息半年，到世盃時可唔可以復出都成疑問，據報國際足協就賠番200萬歐元（約2,090萬港元）畀皇馬。另外，熱刺嘅丹麥中場基斯甸艾歷臣亦喺友賽受傷，熱刺都有樣學樣，向國際足協同丹麥足協要求賠償。
[img]http://static.apple.nextmedia.com/images/apple-photos/apple/20131118/large/img0000012_aa04.gif[/img]
來源:蘋果日報網站