巴塞親子日　美斯尼馬大開殺戒

[img]http://static.apple.nextmedia.com/images/apple-photos/video/20130926/org/1380142116_c9fa.jpg[/img]

尼馬終於開齋喇！今周中西甲加開快車，巴塞隆拿主場4:1輕取皇家蘇斯達，開季6戰全勝，就唔係咩特別新聞，最特別就係巴西前鋒尼馬，終於取得加盟後首個西甲入球，不枉佢賽前同美斯齊齊帶埋愛子入場打氣。
巴塞今季好興主場出擊，都有球員帶埋仔女出場，上嗰場中堅碧基就帶埋佢位乖仔米蘭，今場一對前鋒美斯同尼馬，就齊齊抱仔。尼馬雖然比美斯後生4年幾，但就早過美斯做老竇，同前女友所生嘅兒子盧卡，已經兩歲，一頭金髮加上精緻面孔，做童星都得。美斯嗰件堤亞高就約11個月大，一來年紀細啲，二來冇咁靚仔，呢個show B行動，似乎尼馬勝一籌。

[b]美斯被換出：冇不滿[/b]
講番場比賽，巴塞面對留力嘅皇蘇，戰情都幾一面倒，5分鐘尼馬就門前建功，終於喺聯賽開齋，威畀阿仔睇㖭；巴塞入波又點少得美斯，3分鐘後頭槌建功，頂成2:0，入球增至7個，之後布斯基斯禁區頂勁射，助巴塞半場領先3:0，換邊後，皇蘇一度破蛋，不過中堅馬斯巴查埋齋，助巴塞主場大炒4:1，開季6連勝。
聯賽開齋，尼馬就好興奮咁講：「雖然入波唔係好靚，仲有啲混亂，但都值得紀念，我會將入球獻畀乖仔盧卡。」美斯81分鐘退下火線，出場期間再次黑面，傳媒就炒作佢不滿教練馬天奴唔俾佢打足，不過事後美斯就澄清絕對支持教練調動，完全冇不滿。雖然巴塞開開心心拎3分，但中堅馬斯真蘭奴上半場已右腿傷退下火線，要休息超過兩星期，下周中作客些路迪嘅歐聯唔使預佢。
同巴塞齊齊6連勝嘅仲有馬體會，馬體會周二主場對奧沙辛拿，靠迪亞高哥斯達梅開二度，以2:1勝出。其實馬體會呢場贏得險，事關佢哋留力周六作客皇馬嘅首都打吡，領先2:0後放鬆，奧軍由奧利奧爾馬占完半場前破蛋外，下半場更幾乎追平，爭啲令馬體會失分。

[img]http://static.apple.nextmedia.com/images/apple-photos/apple/20130926/large/img0000012_aa03.gif[/img]


來源:蘋果日報網站