舒利亞馬甸尼鬥波　夏柏紀念賽星閃閃

[img]http://static.apple.nextmedia.com/images/apple-photos/video/20130913/org/1379017941_8fa7.jpg[/img]

球壇成日都有好多紀念賽或者告別賽，向球會陣中嘅老隊員或名宿致敬，通常呢啲場合都係掌聲雷動，一片歌舞昇平。不過，紐卡素周三幫前後備門將夏柏搞咗場紀念賽，全場噓聲四起，因為佢哋無厘頭搵咗宿敵新特蘭嘅領隊迪肯尼奧嚟踢；最後迪肯尼奧仲射入12碼，幫AC米蘭明星隊擊敗紐卡素明星隊，搞寸夏柏個party！
夏柏喺紐卡素效力20年，幾乎咁耐都做後備門將，真係無名功臣。38歲嘅夏柏今夏轉去侯城，紐卡素為咗紀念佢嘅功績，幫佢搞番場紀念賽，而且一呼百應，舒利亞、費迪南、高爾同真路拿等紐記名宿都有出席，最巴閉嘅係請到AC米蘭明星隊做對手，入面有「馬仔」馬甸尼同巴里斯，真係星光熠熠耀夏柏！不過，喺AC明星隊入面竟然有「黑貓」主帥迪肯尼奧！

[img]http://static.apple.nextmedia.com/images/apple-photos/apple/20130913/large/aa03_05_a.jpg[/img]
■迪肯尼奧（圖）協助AC明星隊，擊敗主人家夏柏的紐卡素明星隊。資料圖片

[b]噓聲中射贏12碼[/b]
話晒呢場係紐卡素同夏柏嘅party，但無啦啦請宿敵嘅領隊嚟，我求大俠都覺得有啲唔妥。現場5萬名紐記fans更加用行動表達不滿，當賽會宣佈迪肯尼奧出場，全場狂噓；但迪肯尼奧一於少理，仲得意洋洋咁行出嚟，向紐記球迷飛吻，擺明挑機啫！場波法定時間互交白卷，要互射12碼分勝負，AC嗰邊火上加油，竟搵迪肯尼奧出嚟射。喺全場噓爆下，迪肯尼奧射破夏柏十指關，最終幫AC贏2:1。以波論波，迪肯尼奧係呢場焦點，盤扭射波好有水準；佢仲會玩嘢，搶走球證卡頓保張紅牌嚟玩。
雖然紀念賽輸波，又噓聲四起，但夏柏都高興，佢話：「能夠令眾多球壇名宿聚首一堂，我覺得這是一份光榮。」踢完紀念賽，佢返番去侯城，繼續專心做佢嘅後備門將。

[img]http://static.apple.nextmedia.com/images/apple-photos/apple/20130913/large/13s3-312p.jpg[/img]
■紐卡素為夏柏（右）辦紀念賽，名宿舒利亞（左）及費迪南（中）也有出席俾面派對。


來源:蘋果日報網站