贏西超盃都冇用　美斯衰格真面目

[img]http://static.apple.nextmedia.com/images/apple-photos/video/20130830/org/1377807155_beed.jpg[/img]

巴塞隆拿喺周三西班牙超級盃，返到主場同馬德里體育會互無紀錄收場，總比數踢成1:1，僅靠作客入球優惠捧盃。其實巴塞原本唔使搞到喺魯營主場入唔到波咁失威，但傷癒復出嘅美斯12碼宴客；球王仲喺場外俾西班牙傳媒踩多腳，話佢人前形像大好人咁，但私底下原來係球霸，成日鬧班年青球員兼搶晒啲波射。

[b]主場悶和馬體會[/b]
巴塞喺上季只係試過兩次主場入唔到波，同樣都係歐聯賽事，要數西班牙本土主場比賽冇波入，就已經係接近兩年前，迎戰西維爾嗰場西甲。呢場西超盃次回合賽事原本都幾有睇頭，今季加盟嘅尼馬首次正選上陣，同傷癒復出嘅美斯合作，不過兩大南美球星喺比賽度冇咩火花，教練馬天奴賽後都話兩人要啲時間去磨合。
成場波巴塞唔算佔壓倒性優勢，反而馬體會有幾次入球良機。馬體會喺81分鐘，有後衞菲臘路爾斯被逐，去到88分鐘，巴塞本來有打破僵局嘅機會，柏度洛迪古斯喺禁區被撞跌，12碼由美斯操刀，但後者竟然「宴客」；馬體會喺完場前，再有已經被換走嘅阿達杜倫衰多口而攞紅牌，最後仍然維持0:0賽果完場。不過，巴塞依然贏到西超盃，歷來第11次封王。
美斯喺季初受傷患困擾，到𠵱家表現都唔算好突出，西班牙八卦網站《機密新聞》就趁機會落井下石。

[b]美斯被爆專恰新仔[/b]
呢個網站引述一名冇公開姓名嘅巴塞青年軍球員講，美斯曾經喺場上狠狠斥責過近一兩季由B隊冒起，𠵱家已被列入一隊陣容嘅基斯甸泰路：「你啲咁嘅新仔乜嘢都唔係，唯一要做嘅就係將個波傳畀我，你喺度就係要為我而踢波。」又指美斯曾經公開狠批過另一隊友、智利國腳阿歷斯山齊士：「我都唔知你踢乜，更加唔明球會點解要使咁多錢買你返嚟。反正你都入唔到波，快啲交晒啲波畀我。」
當然，一面之辭又唔可以盡信，個網站爆料之後都引起信同唔信兩方面嘅爭論；有人話美斯徹頭徹尾係好謙虛嘅人，亦有人話好多效力過巴塞嘅人都頂美斯唔順，好似韋拿就選擇走人。我求大俠話講乜都假，到美斯回復番最高水準，全世界咪又係當佢神咁拜囉。

[img]http://static.apple.nextmedia.com/images/apple-photos/apple/20130830/large/img0000046_aa08.gif[/img]
■巴塞贏得今季第一項錦標，歷來11次奪得西超盃冠軍。



來源:蘋果日報網站