咖啡妹終極FF　法拉激咀Sam哥兩鑊

[img]http://static.apple.nextmedia.com/images/apple-photos/video/20130828/org/1377634986_b4d1.jpg[/img]

其實《衝上雲霄II》嘅主角，並唔係Sam哥同Cool魔，而係一大堆維他命水，集集都攝幾攝，洗腦功效極佳，不過效果係正面定反面，就真係唔知啦。

今集呢堆維他命水，仲做埋Triangel嗰份，俾傅嘉莉用嚟索，索一索吳卓羲(即係Issac)陣味，真係舒筋活骼。之前講到Issac用幾箱維他命水喺沙灘砌咗個心，諗住冧杏兒，點知就俾一直暗戀佢嘅咖啡妹傅嘉莉路過見到，以為送俾佢添！

呢堆維他命水嘅命運仲有後續，原來俾咖啡妹運咗返屋企，今集見佢儲起呢堆維他命水嘅吉樽，仲要支支樽蓋都有個哈哈笑。之後就見咖啡妹拎起支水起勢咁索，仲幻想自己同吳卓羲咀嘴。媽呀！好毒呀！

今集《衝上雲霄II》都有好多咀嘴鏡頭，好似馬明同黑絲儀激咀，傅嘉莉又幻想同吳卓羲咀，而觀眾最想睇嘅，都應該係Sam哥同法拉(何年希)嘅咀戲啦！

Sam哥同何年希呢一對，其實都叫一齊咗，噚晚係羅馬浴場傾傾下計，仲咀左添！都係由何年希做主動，一嘢咀埋去，塞住Sam哥把口！

鍚完，何年希話：「咁咪冇錯囉？」Sam哥話(sweet樣):「錯㗎，犯咗規呀！」然後法拉又一嘢咀落去啦，法拉真係好鬼主動，之前又裸背挑逗Chilam，噚晚又主動攬同拖住Sam哥，不過對住法拉，邊個男人頂得住先？


來源:蘋果日報網站