Cool魔怒踢下體　哭擁囧囧兄妹相認

[img]http://static.apple.nextmedia.com/images/apple-photos/video/20130807/org/1375819460_825f.jpg[/img]

經過前晚「Cool魔」張智霖同Holiday陳法拉喺古堡激情戲後，噚晚呢集《衝上雲霄II》就顯得好平淡，連陳法拉戲份都冇呀。
噚晚嗰集主要講顧夏晨（胡杏兒飾）被外籍機師Bass摸背，起初夏晨都諗住多一事不如少一事，不過經過唐亦風（吳卓羲飾）鼓勵及開解後，佢最後決定挺身而出，告Bass性騷擾。
起初Cool魔唔知細妹被輕薄，不過當佢從Roy（馬國明飾）口中得知胞妹被性騷擾後，即時怒火中燒，揸車搵Bass算賬，Cool魔發現Bass後落車，然後二話不說揮拳相向，兼怒踢對方下體，之後Sam哥吳鎮宇及時出現阻止，雖然Cool魔難逃停飛處分，但愛妹心切嘅佢願意承擔後果。
而夏晨事後得悉胞兄因為佢嘅事而被處分，佢都感到愕然，仲去瞭望台搵阿哥，兩兄妹喺瞭望台訴心聲，講講下仲一齊喊，最後夏晨終於原諒哥哥，兩兄妹相擁而泣，好感人呀﹗
唔知大家噚晚有冇留意到，無綫植入式廣告真係無孔不入，噚晚就輪到維他命水啦，無論係飛機上嘅餐車，抑或吳卓羲同胡杏兒踩單車時，不停影住部維他命水機，到佢兩個買咗兩支維他命水喪飲，真係太hardsell呀..


來源:蘋果日報網站