《星夢》璧琦失準　校長克勤反高潮

[img]http://static.apple.nextmedia.com/images/apple-photos/video/20130722/org/1374436078_d666.jpg[/img]

《星夢傳奇》第三集昨晚出街，大家先前都已經知評判除葉倩文(Sally)之外，仲有趙增熹、譚詠麟(阿倫)同李克勤。

第一個出場嘅係梁烈唯(唯唯)，佢話自己條腰傷咗，不過因為揀咗阿倫《愛情陷阱》，仲要唱歌加跳舞，唯唯真係好勇喎！

唯唯已經唱得好盡力，同dancers又落力跳跳跳，不過佢始終唔係歌手，一開始唱頭兩句已經露晒底子，連阿倫喺旁邊聽咗一陣就已經放低個耳機...

「這陷阱、這陷阱、這陷阱，偏我遇上...」可能0依家唯唯會覺得首歌變成個「陷阱」，就算有阿倫最後俾足面贈咗85分，但加埋其他評判同觀眾評判嘅比分，都係得158.5分，以全場最低分被out，不過被out一刻，佢已經返咗過去第二個廠拍《飛虎II》，惟有過後share感受...

另一個參賽者，一直保持前列位置嘅羅鈞滿(阿Moon)，可以話係全場唱得最放、最有台風嘅一個，加上佢揀嘅歌係《暴風女神 Lorelei》，氣勢真係比較強，唱得都叫唔錯之外，仲搞到阿倫都忍唔住要同阿Moon一齊唱番段，羅鈞滿嘅得分都唔錯，有171.6分，比一直帶頭嘅鄭俊弘少4分咋！有175.6分嘅鄭俊弘，佢之後出場唱《愛的根源》，係一貫咁好聽，不過就同其他參賽者一樣，因為都係揀慢歌，所以氣氛唔似上兩集咁好。

其實，今集有阿倫同李克勤上嚟，氣氛照計都係靠佢哋帶起，可惜連佢哋中場表演時揀咗首《酒紅色的心》，慢到差啲聽到瞓著覺...唔通，係唔唱啲太勁嘅歌令參賽者更加緊張？

來源:蘋果日報網站