2013-7-11 14:20
sinta
索模真空揶揄 侯克森巴隊友離婚
巴西前鋒侯克搞到隊友迪亞高卡華利尼離婚？大家咪誤會，佢冇同卡華利尼搞埋啲不尋常關係，而係佢唔覺意share咗卡華利尼一張露鳥相，之後卡華利尼老婆搵呢件事炒作，拍露半球相博上位，「憤怒鳥」卡華利尼咪揚言要同結婚7年嘅老婆離婚囉！
[img]http://static.apple.nextmedia.com/images/apple-photos/video/20130711/org/1373486112_3c6d.jpg[/img]
話說巴西喺上月30號贏咗今屆洲際國家盃之後，效力辛尼特嘅前鋒侯克就喺instagram，分享佢同隊友利華漢拔圖喺更衣室捧盃嘅威水相。表面睇張相冇乜特別，但原來暗藏玄機，當時坐喺利華漢拔圖背後嘅後備龍門卡華利尼，只係包住條毛巾，張相咁啱就影到呢位前利物浦球員走光「露鳥」。侯克知道之後，嗱嗱臨刪咗張相，可惜仍救不了，事關好多粉絲睇到卡華利尼張露鳥相後，cap咗相掟落討論區。
[img]http://static.apple.nextmedia.com/images/apple-photos/apple/20130711/large/img0000100_aa04.gif[/img]
■卡華利尼（放大鏡內）意外喺侯克（左圖左）張捧盃相度露鳥；而前者老婆丹妮艾拉（右圖）借老公嘅瘀事，露半球博上位，唔抵爭。設計圖片
嬲老婆踩住佢上位
侯克事後猛咁同卡華利尼say sorry：「我同卡華利尼解釋咗，佢知道我唔係特登咁做。我咁做係一啲惡意都冇，冇諗過會傷害到其他人。」目前效力富明尼斯嘅卡華利尼都好明白事理，所以亦原諒咗侯克，但就唔肯原諒佢老婆囉。點解會咁？事緣係張相喺互聯網廣泛流傳之後，卡華利尼老婆丹妮艾拉竟然同記者講：「我好妒忌囉！」
咁都未算，本身係模特兒嘅佢抽完老公水之後，仲聯絡雜誌，模仿卡華利尼嘅走光姿勢，半裸影咗張姿勢一樣嘅露南半球相。而佢咁樣做，事前原來冇話畀卡華利尼知，卡華利尼認為自己老婆咁做好唔尊重佢，簡直唔可以原諒，仲即刻搬走埋。小道消息仲話，卡華利尼認為丹妮艾拉唔撐佢都算，仲賤到攞佢將露鳥相嚟開玩笑，兼且仲用自己嚟上位，所以先揚言要離婚。一張相就搞到隊友頭家隨時散，睇嚟侯克喺下一次再分享自己啲相嘅時候，要碌大對眼睇清睇楚有冇問題至得嘞。
來源:蘋果日報網站