2013-7-11 13:45
sinta
揭《衝上雲霄II》必睇場口 咀戲連場
飛機升降，人來人往，轉眼一晃，十年時光。
無綫籌備經年的《衝上雲霄II》下周一（15日）再次啟航，能否安全到達彼岸仍是言之尚早，但它滿載台前幕後人員的血汗與夢想，使命亦清晰明確——重振TVB劇聲威。續集是經典的延續，這不只是Sam的個人航空夢，也是港人失落已久的電視夢。
撰文：何慧斯
[img]http://static.apple.nextmedia.com/images/apple-photos/video/20130711/org/1373487276_cfb3.jpg[/img]
十年前，無綫播出《衝上雲霄》創出多個傳奇：吳鎮宇、馬德鐘及陳慧珊的三角戀成愛情經典；馬國明、吳卓羲及胡杏兒憑此劇上位；投身航空界的年輕人也大幅增加。那些年，是電視的黃金時代。
[img]http://static.apple.nextmedia.com/images/apple-photos/apple/20130711/large/11ed2p25a.jpg[/img]
■《衝上雲霄II》中，由陳法拉配張智霖，且看能否帶來新衝擊。 劇照
相隔十年，無綫推出續集，盡量沿用舊班底，寄望再創傳奇。然而歲月變遷，演員年長了，機場日益繁忙，拍續集無疑是艱巨挑戰，兩位幕後功臣歐冠英及陳維冠感受最深。二人日前接受本報專訪，淺談製作上遇到的壓力。身兼編審及監製的歐冠英說：「有啲壓力，大家有期望，加上《衝上雲霄》出街到𠵱家已經有十年，喺十年裏面，我哋不斷嘗試，希望可以拍續集，當中遇到好多困難。𠵱家套戲拍完，某程度叫塵埃落定，等觀眾去畀分。」
陳維冠則說：「其實製作比第一輯難好多。第一，十年前機場人流未有𠵱家咁多，可以封個位畀我哋任拍。𠵱家基本上係唔會借畀我哋日頭拍戲，工作人員要收咗廠，半夜再出去拍外景。如果要拍日光戲，通常要拍到第二朝5、6點，趁住有啲日光搶埋嚟拍，總之7點前一定要交場。第二，就算喺外埠拍外景，同樣面對唔同難題，好似天氣，又或者外國人合作嘅文化，同上次好唔同。」
[img]http://static.apple.nextmedia.com/images/apple-photos/apple/20130711/large/11ed2p28a.jpg[/img]
■《衝上雲霄》中，吳鎮宇與陳慧珊這個配搭，至今仍是不少視迷的最愛。
資料圖片
[img]http://static.apple.nextmedia.com/images/apple-photos/apple/20130711/large/11ed2p19a.jpg[/img]
■歐冠英（左）與陳維冠暢談構思《衝上雲霄II》的點滴。
陳俊強攝
「共挽手一起再衝刺」
當年觀眾最初認定吳鎮宇與陳慧珊是一對，怎知中段來個大扭橋，將吳鎮宇的感情線放在胡杏兒上，陳慧珊則情定馬德鐘，由於情節驚喜，超越TVB劇的慣性模式。續集在人物安排上同樣落足工夫，由越老越man的吳鎮宇飾演Sam外，亦加入另一型男張智霖及索女陳法拉。歐冠英說：「我相信觀眾好期待幾個主角嘅感情點樣擺位，因為上輯Sam哥同Zoe（杏兒）某種程度上去到一個段落，人生再經歷十年，必然會有轉變，係咪咁一帆風順？所以我哋安排Sam哥遇到好大挫折，跟住開始另一段人生。所以大家會見到Sam哥喺倫敦整吓蛋糕、餵吓白鴿，當然大家都期望Sam哥回歸，呢個係一個設計。」
看過《衝上雲霄》的觀眾，對緣份天使（Triangel）一定不會陌生，今集緣份天使繼續貫穿整套劇，更會落在不同角色手上，牽引着幾段戀情。歐冠英認為這是一份延續：「我想觀眾有耐性去睇，感情鋪排係要慢慢靠相處、靠累積，我知有觀眾會估計到Sam哥同Captain Cool（張智霖）最後情歸何處，但我希望觀眾唔好咁樣去消化套戲。Sam哥同Issac兩條線係延續，部份演員亦都係延續。故事發展落去應該會點，希望觀眾抱開放態度，慢慢同佢哋入戲，感受吓佢哋嘅遭遇。我哋有40集，唔好咁急，觀眾慢慢會明白我哋角色嘅處理同鋪排。」
[img]http://static.apple.nextmedia.com/images/apple-photos/apple/20130711/large/11ed2p20a.jpg[/img]
■《衝上雲霄》講述航空界的愛情故事，是無綫的經典重頭劇之一。
劇照
「天空海闊我共你」
TVB劇在處理感情戲總有一套方程式，但最令筆者驚喜的，是今集在創作上加入一個主題：守護，並借胡杏兒飾演的飛機維修員去帶出這道理。歐冠英說到此時眉飛色舞：「如果冇人喺飛機入面，檢驗每一口螺絲釘，確保每一件機器百分百安全，喺空中飛行就會有問題。人同人之間亦一樣，一份感情、一份感覺，都需要守護。好似愛一個人，你點去守護呢份感覺？我哋仲會將感情擴闊啲，會講友情同親情。」
近年TVB劇愛灑鹽花、玩重口味，歐冠英預告劇中有些感情模式，觀眾未必會認同，她說：「我哋包羅咗好多現代、好都市同國際化嘅男女關係，大家或多或少會喺身邊朋友發現啲影子。任何感情模式都會存在，有啲觀眾會認同，有啲未必會，但係呢個世界就係咁。我相信會比上輯更豐富，因為今次卡士多咗好多，因為佢哋都成長咗，處理感情擺位都唔同咗。」
這十年來，TVB雖仍坐享慣性收視，但劇集水準似有下跌迹象，觀眾亦開始有微言，加上隨時要面對王維基的挑戰，《衝上雲霄II》可能是重上金漆招牌之作。陳維冠信心十足：「無論喺製作、機器、燈光、攝影、演員，甚至乎科技上，都可以睇到進步緊。去到呢個階段，我壓力已經放低咗，因為《衝上雲霄II》唔會失禮觀眾。」
訪問尾聲，兩人對吳鎮宇的復出依然讚不絕口。歐冠英說：「吳鎮宇好忙，諗咗好長時間，出街多人話叫做啦，好多人都期望佢再出現。佢為咗廣大觀眾、粉絲先再接拍。佢keep得番啲搞笑位，女仔會好鍾意佢，難得有一個咁情深嘅人。Chilam今次唔係做乖仔，新角色有唔同嘗試，會好立體。」
來源:蘋果日報網站