色情雜誌(冇色情ar)

色情雜誌又俗稱「鹹書」，可以話係每個男仔都一定曾經擁有過o既o野，而且唔同年代都有較具代表性o既鹹書。而傢電影〈豪情〉講緊o既內容，絕對可以話係生動咁刻劃出新一代o既男仔。不過有時男仔睇鹹書未必係因為鹹濕，可能係為o左同同輩有共同話題而必須要睇，就好似師奶唔睇電視劇就o係街市搭唔到嘴一樣，你話幾咁孤獨。帶鹹書返學校分享，更可以話係一種社交禮儀，但係呢種做法，除o左會俾學校o既老師罰之外，原來仲分分鐘會招惹四方八面o既鹹濕鬼。（九龍官塘區 祥仔 16歲）

我讀o個間係男校，所以學生一般都比較頑皮，同學成日都會帶鹹書返學交換睇，所以校方成日都會突擊檢查書包同儲物櫃。但「你有張良計，我有過牆梯」，o的同學通常都唔會將鹹書收o係自己書包同儲物櫃，因為搜到o既話就一定會斷正，因此三樓o既男廁就成為同學們o既鹹書藏書閣，搵膠袋包好之後，就收o係廁所水箱上面，就算搜到都唔知係邊個o既。

因此我上廁所o既時候，成日會爬上廁塔伸手到水箱後尋寶，不過鍾意尋寶o既人實在太多，所以近排都好少有收穫。雖然成日都係失望而回，但我呢種壞習慣依然不時會發作。呢日，我又懷住興奮o既心情，一腳踏上雪白o既廁塔，側身伸出右手繞過水箱，指尖憑感覺緩緩向前摸索。最後我竟然發現o左一個黑膠袋！個袋並唔重，但係就密封o左，我花o左好多時間都解唔開，悶熱o既廁格令人心情極度煩躁，所以我揪住膠袋o既兩頭，出盡蠻力大力拉扯，黑膠袋即時應聲而破，跟住就發生o左我認知之外o既事。

黑膠袋裡面係一個女人o既頭顱，佢仲披頭散髮咁裂嘴笑，但唔夠一分鐘o既時間，一切都消失曬，包括頭顱同黑膠袋o既碎片。吶既ㄧ怑惜w經唔識思考，唯一曉做o既就係逃離現場，之後我都維持o係癡呆o既狀態，直至當日入夜。o個個女人o既恐怖笑容都仲不停咁o係夢境中出現。

（新界元朗區 David 17歲)

呢件事大概發生o係一年前，我o個陣時讀緊中五，所以成日都o係學校自修室溫書，直到黃昏七點學校差唔多閂門先走，通常都隻係得返兩三個同學。冬天o既時候，七點基本上天已經黑曬，校工又熄曬燈，所以由自修室通去學校正門大堂o既路，隻係得街外微弱o既燈光透入o黎照明，如果一個人行o既話，真係幾得人驚。

有日學校差唔多閂門，我自己一個人經過呢條走廊，迎面冇端端吹起強風，一張紙隨風咁飄到我o既腳邊，我好奇咁執起o黎睇。原來係一頁色情漫畫，漫畫裡面畫o左一個裸女死神從墳墓入面爬出o黎，我覺得幾得意，所以就收埋o左入書包，點知怪事就發生喇！

連續幾日我都好夜走，但係每一晚經過走廊，都會發現一頁色情漫畫，而且仲要係順序連續o既添！漫畫裡面o既劇情逐漸清晰，死神離開墳墓之後，要o係人間搵一個替死鬼返去地獄。佢走過好多地方，殺o左好多人，捉o左好多o既靈魂，但係都搵唔到一個佢滿意o既；直至佢去到一間學校，而呢間校舍非常眼熟，因為就係我讀緊o既學校。

我開始有o的驚，所以將所有漫畫捲埋落舊報紙堆度，然後提早離開學校，可能因為咁我真係冇再執到漫畫頁。就咁樣過o左一個月，我漸漸唔記得o左呢件事，但係呢晚我又再遲o左離開，漫畫頁又再次出現，漫畫上o既死神好嬲，而且o係呢一晚，終於o係走廊遇上佢o既目標。

我轉身一望，果然見到一個黑影慢慢咁接近我，嚇得我兩腳發軟，但就o係呢一剎那，黑影傳o黎慘叫聲之後就消失o左，我完全唔知點解。後來先知道，咁o巖o個日我阿哥去燒烤，拎o左堆舊報紙，可能好彩及時燒o左o的漫畫，所以我先可以化險為夷，自此之後我都唔敢亂執起地上o既o野。