2012-5-15 02:04
wilson015
鍾意舉中指入泥睇睇
時間：十幾年前•撞鬼地點：墳場•人物：佩佩
嗰果陣，佩佩仲好細個，佢跟住Daddy、Mummy去墳場度拜祭，點知行行吓，佩佩突然仆親，之後都冇乜事發生。
某一日，Mummy同佩佩剪指甲，剪到中指時，佩佩失曬常性咁o係度喊，點都唔收聲。
後來有人叫佩媽請道士一睇，就話佩佩鬼上身，好似仲話係因為上次佩佩o係墳場仆親果嗰陣，唔覺意激嬲隻o野，所以咪搞佢囉。
李終貴按：剪到中指喊唔停就係鬼上身？咁終貴個三歲侄仔咪鬼上身得好厲害？佢唔單止剪指甲會喊，一見清潔功夫就會喊，好似每晚洗澡，都要用糖o黎氹吓去先肯沖。
最近湊侄仔個賓妹同終貴講，佢以前同過一傢人打工，呢傢人對佢好好，但係做o左三個月，佢終於同老細講話唔做。
事關佢湊嗰個BB一向好聽話，但係自從搬o左新屋之後，半夜成日喊。每次喊都好似好驚咁。個賓妹覺得間屋有「料」到。
有日，天花板開始滲水，點解樓上會滲水？佢o地打電話去管理處叫人到樓上檢查。管理員話：「佢o地已經三個月冇交過管理費，我o地都想搵佢。」大傢都覺得奇怪，搵個管理員上去拍門，冇人開門，但係聽到入便有細路仔o既聲音，心諗：唔通有大人虐待細路？愈諗愈唔妥，所以報警。
警方上去拍門好多次，但係都冇人，又查過屋主已經移民好耐，上手租客又搬o左三個月，冇理由有細路o係度，所以破門而入去睇吓。
點知發現成間屋真係已經冇人住。但係個水喉又開o左，成個地板已經浸到「黴」，所以浸水浸到下一層。但係三個月咁耐，如果係咁開住水喉，應該成間屋都浸水，但係大廳地板冇水漬。即係話，水喉係有時開有時關。而且點解又成日聽到細路仔聲？
傳聞呢間屋以前曾經有個細路因為貪玩，所以失足跌落街死亡。